普獻法師以台語自述-隨侍長老(四)－普獻法師專網

以下是台南市賴醫師和普獻長老的對話，長老以臺語自述自己的身世，及出家弘法的過程，並接掌元光寺住持至今。內文共分五段：

一、家世環境二、剃度出家三、軍中生活四、隨侍長老五、住持元光。

***本文以臺語漢字呈現，請陳世明博士校對指導，以下是陳老師的創作。***

著作：臺語漢字學、圖解講臺語其實不難等。

網路平台：陳世明老師教學平台，youtube網路平台

閩南語字典：陳世明老師閩南語字典平台。

四、隨侍長老

我出家了後，家己倒轉來臨濟寺帶，抵臨濟寺帶一暫了後，伊們講安爾，出家人愛閉關，就汝俺三個，一個越南人、一個台南人、汝俺三人去雙冬，你知無？喂！屏東，毋是南投、草屯彼兒。有一間寺廟毋人帶，啊！三個就安爾物件款了，就抵山頂帶，彼時附近有百姓，百姓成績無好，攏叫汝俺給教，英語沒曉，叫我給教英語，伊彼兒沒陋，擱收一寡學生；欲安怎閉關，無法度閉啊，我們三個人也真麻煩。有三個人抵彼兒，風聲來，真濟人攏欲來拜佛，三個人講，到底是欲安怎，到底是誰作主持，若沒講，人客來，三個人安爾浪費時間，欲有一個人招待，在佛祖頭前抽籤，抽得我是主持。哇，慘啊，這間寺廟抑更欠人錢，較早之住持講有食薰，走去了，這一間無人，人才介紹我們三個人來，鄰長講你們是毋是欠人真濟錢，你知無？

我做主持我欲安怎創，無法度，寫批轉去我們阿兄彼兒，伊是農會總幹事，錢之方面無問題，我就寫批，喂！二哥，我正需要錢，你寄一寡錢予我。阿兄才寄錢來予我，收了錢了後，我就綽鄰長講，來來來，彼時欠人之錢，毋是我們開之，是加早之人開之，一間一間雜貨店給問，有一寡欠飯錢，有一寡欠菜錢，什物錢、什物錢，拍折，寄來之錢恰恰好，分了了，恰好無半cent。喔！彼兒一間店一間店講，以後你們若欠什物物件，照你們來提，我講沒使沒使。台中有一個作模兒之老闆，聽講伊加早定定來，尾手兒彼个主持走了後；即馬三個真用功，教伊英語教什貨攏會使，攏來護持，一回買二百斤之米，放抵山腳，著給我們講，我二百斤之米抵彼兒，逃一間店，你若欲食米，去擔起來食，安爾。彼時無路，我們之米問題解決了。逐家抵都市買一寡黃豆兒，黃豆和米作伙煮，抑合買彼个黑芝麻，炒炒，就是芝麻黃豆，合糙米飯，這三項安爾過日。啊，無菜，抵山頂露螺足濟，菜一種落去，著無去了，種落去著無去了，露螺太濟太濟，久久才去買什物菜來食，彼當時信徒彼兒，信徒有果子予我們食，住一兩冬了後，胃痛。

玄奘寺彼兒道安法師就來綽我，伊講足濟外國人來，無你之英語沒使，在日月潭旁邊，尾手兒道安法師親身請我去，去了後，就叫我作知客，彼時足濟外國人，什物大使來拜玄奘大師之靈骨，足奇怪，我去帶，蜂神就來了，蜂蜜會當食。我睏彼兒，放鞋彼兒，喔！有一日睏到中晝，嗡嗡叫，嗡嗡叫，彼个是什物物件，即馬看鞋箱兒，幾萬隻，出出入入。我看了真著驚，二工或是三工著結一儔抵彼兒，我就拍電話予姓葉，伊專門這個蜜，伊講你緊釘箱，釘釘，啊！留一個孔親像一枝箸，會當予伊入去著好，一禮拜了後，我才給你們處理，欲放抵向南，沒使向北，向北會加冷；欲向南，嘴欲向南，彼兒有柴間兒，我就放置柴間彼兒。伊就來了，來之時陣，拍開，歸手安爾給捧入去，捧入去。彼隻彼隻！彼是母之，彼个上要緊，彼隻給掠著，給擲入去，逐隻都偎過來，蜂王。有一個德豐法師，有一天太閒，樓梯揭著安爾給看，這兒予叮一下，喔這兒膨起來，你彼兒有洛基影像，膨一蕊，你修到真好，修到膨起來，伊講無，彼是予蜂叮著，足濟趣味之事志，尾手兒我們之師父，就無歡喜，你抑少年做知客，毋好，愛趕緊去閉關，安爾。

我毋這目屎含著，師父之命令沒使無聽，就走來山頂閉關，彼時中觀彼兒是草茨，就是元光寺頂面之中觀，以前彼爿無茨，只有一個破破之竂兒，彼時陣之師父，就是在----。我就是抵玄奘寺來這爿閉關，我本身是位玄奘寺來這兒閉關，有人來介紹予我，講你之師父，這兒之師父去日月潭放生，我講你彼兒有所在予我閉關無，他講有啊，有一間破茨，會性法師以前帶之所在，破破爛爛之茨，我講好著來，來這兒閉關，彼兒是破瓦茨、草茨，低低之，即馬是起了，逐工攏有鳥鼠咬草來，咬到彼兒之土腳。我想講奇怪，我一個人抵這兒，若有草抵內底，有一工好奇了，我彼時閉關逐工就是安爾，幾點幾分，食飯放屎，讀經拜經，喔安爾操操。

什物人煮飯予你食？家己煮，尾手兒逐工就看鳥鼠，咬彼寡草來，我講你若安爾沒妥當喔，我逐工無閒，你逐工咬草來，我逐工安爾掃，毋好了，足大隻，一直給我看，一直給我看，我就踞著，你是欲皈依喔，你若欲歸依就來我之手，我踞了去，喔真正跳起來，走來我之手，我之心臟呯呯叫，你若給我咬了，慘了！一直給我看，我講你若欲皈依，你欲懺悔業障，你毋通出世做鳥鼠，我講皈依佛皈依法皈依僧，皈依好了，毋緊走，伊一直給我看，我就放棄了，你知無，我就去摸伊之嘴鬚，伊更予我摸，摸伊之嘴鬚，目珠金金給我看，我問講好了，好了好了，你皈依了，好走了，後工毋通咬草來，一會兒，走去了，第二日了後就沒咬草來，也無逐工咬一堆草來彼兒，伊可能會做儔，我講這兒沒使予你做儔，彼隻鳥鼠足大隻、足大隻。

我抵彼兒閉關，閉關了後，即馬住持就叫我緊接，你來做主持，你會曉講客話，這兒攏講客話，你來做。沒使！我講我更抵讀英語，讀彼个美國學校之英語，藉這個讀英語，其實無了，走去台北，去接印順導師之慧日講堂，做當家，去做當家了後，開始辦活動了，大專佛學講座，還辦彼个兒童班，拜六禮拜囝足濟，攏是囝，欲安怎。有一個講堂足大，有桌兒椅兒，囝來叫伊們坐，我講故事予伊們聽，教伊們唱歌，有來之頓印兒。頓幾個印兒，就賞一個金牌，觀世音菩薩彼个披兒錬。

尾手兒就寒暑假挈帶伊們，坐遊覽車去汐止，去扒山安爾，民國六十一年、六十二年，這二年我攏抵台北，慧日講堂做當家，安爾，小學校合你合作，小學生足濟，台北彼些之囝無逃通走，彼个民國六十一年之時陣，有之走來寺廟，牛聲馬喉，我講沒使予人驚著。我着叫伊們來，愛帶冊來寫作業，我著請台大之學生，給我們鬥照顧，沒曉就問這個大哥哥，我着講故事給伊們聽，教伊們唱歌，觀音靈感歌、三寶歌，什物貨攏教伊們唱。今兒日換我講故事予伊們聽，禮拜時會曉講，就賞金牌了。叫作性梵法師，伊一直綽我講，你去啦，你少年你去啦，我彼時三十幾歲，三十二歲，想想，台北安爾，鼻腔摸了到底攏烏烏，還是毋好，我講等歸禮拜，我之戲演了才去，彼時恰好演「萬金和尚千金小姐」，彼个台視就來綽我，綽我去演戲安爾，彼个小姐是電影名星，著追來我後壁，我著念阿彌陀佛，拍法器安爾，給挈帶著旋，給帶著旋安爾演，無幾分鐘，二千圈，彼時錢大圓，一個月之薪水。彼个女主角，就是彼个小姐姝姝之，伊企著我之後壁，其他人也是出家人，足濟跪著，我著念阿彌陀佛、阿彌陀佛，伊就綴我後壁，綴我行，安爾旋幾輪，二千圈無歹。即馬轉去慧日講堂，邊之囝講，你是玉琳國師，無啦！無啦！彼是作戲，彼時我加少年，無親像即馬是老貨兒面，老貨兒面，逐家擱認我是玉琳國師。