長老以台語自述軍中生活(三)－普獻法師專網

以下是台南市賴醫師和普獻長老的對話，長老以臺語自述自己的身世，及出家弘法的過程，並接掌元光寺住持至今。內文共分五段：一、家世環境二、剃度出家三、軍中生活四、隨侍長老五、住持元光。

***本文以臺語漢字呈現，請陳世明博士校對指導，以下是陳老師的創作。***

著作：臺語漢字學、圖解講臺語其實不難等。

網路平台：陳世明老師教學平台，youtube網路平台

閩南語字典：陳世明老師閩南語字典平台。

三、軍中生活　　　　　　　

　　伊就轉去，伊轉去了後，我就接着兵單，二十一歲兵單，欲去作兵，我也無轉去花蓮，我之戶籍抵花蓮，應當去花蓮坐車去，我抵台北直接，一直坐去台南訓練中心彼兒去，彼个衛兵看著一個和尚來，喂！和尚，這是作兵你來這兒創什，我就是欲來作兵，伊講你是什物部隊，我講我是花蓮，花蓮抑沒到位。哇！腹肚枵，無法度走去外口，去買這個菜食食，到四點外，官田之車才到位，看著花蓮車，我就和伊們作伙入去，啊！你和尚來欲創什，我講我欲來作兵，我彼時穿出家衫，哇找到我之單位了後，彼个連長講，你這個出家之，緊褪，這個兵兒衫予汝穿，好！汝之衫包包兒緊寄轉去，這兒沒使放出家衫，我講好，換兵衫。　

　　伊看著我之學歷沒陋，英語什物攏會通，你坐抵這兒，創什？伊講彼阿兵哥新來之，給你寫名、身分證號碼。這個槍喔，一人一枝予伊，伊們之槍有號碼，你愛寫；伊講國語，兵籍號碼什物之，你愛寫，我坐抵彼兒，彼些兵兒一連百幾位，一直寫寫。第二天叫我去教室，教伊們讀冊。

啊作兵之時陣，叫我作教官，教彼些兵兒，我是中國人，汝俺之總統是蔣中正，喔！反攻大陸，寫字，彼著時陣，攏無想欲讀冊，彼時之教育，汝俺讀較彼爾兒懸，讀英語逐項攏讀，這個攏簡單囉，我就企著那兒教彼些之兵，百幾個，一連百幾個，安爾。上課，即馬就去拍槍，一百公尺二百公尺三百公尺，我彼時目珠好，一百二百三百我攏拍了足好，內底有人揭著槍，著頻頻搐攏拍沒著，即馬攏著欲考試，考試若無及格，連長是無面子，我攏拍了誠好。所以拍無及格之，攏企著我邊兒，即馬分槍子了後，歸個槍子攏交予我，我看幾個人，這個幾個，我給伊拍幾分，劈劈拍拍攏給拍，拍給逐家攏足濟；我們之連長足歡喜，汝俺這連攏通過，就是這個和尚彼爾厲害，今兒予你放假，今兒予你放假，我說做什物，哇全部都通過了，喔營長真歡喜啦，彼个連長有面子。

今天給你放假，你出去到台南彼个什物寺廟，去拜佛祖，喔我就足歡喜，行去拜佛祖，汝俺抵彼兒無熟悉，我著秤採講這個名，我欲找某某法師，伊講我們沒這個法師，就無彼个人，無熟悉人我就烏白講。我穿軍服啦，我就有錢，我中晝欲來這兒食飯，彼時一百圈真大，你們知無，一百圈給添落去，伊講這個兵好，叫我去食飯。有法會，去台南彼兒一間，我想沒起來。所以彼一工轉來了後，哇可憐喔，彼些人抵土腳扒，逐家攏安爾扒，用手安爾扒，我毋免操。

畢業彼時陣，我第二名，中心訓練出來了後，伊給我調去台北，有五個去兵工學校，創什貨你知無，修理車，歸台車喔，歸個攏給剖，剖到清氣噹噹，輪兒米相兒分電盤什物之，攏剖，六個人一台車，總剖，剖一禮拜，剖好了後；更鬥倒轉去，見面禮，這叫做見面禮。所以我對車方面，有小寡兒研究。

尾手兒作兵之時陣，我們之堂妹，伊帶抵台北作護士，伊抵機場給人注射，注預防射，伊叫我阿兄，堂哥，我有一個朋友給你介紹，予你們熟悉敢好，我講你就綽禮拜四，喔伊著挈帶彼个查某囝，姝姝兒，伊講，這個予我堂哥，看你們二個有緣無，安爾。我彼時穿軍服，手烏抹抹，修理車當然手烏烏，伊看著我當然毋給我握手，我也毋愛洗手，我想講隨在你，你那會介紹，熟悉一下那有要緊，講兩句話斡頭著走，我毋知伊是什物名，就無更來往。

抵兵學校畢業時陣，我第一名畢業，彼時第一名第二名，可以家己選單位，逃位是上好單位？我就想講喔，來選台北，結果無，金門欠兵，不管你是第一名第二名上尾名，總去，全兒去金門。哇彼實在毋識坐過船，坐著實在有艱苦，船安爾搖；風！坐二十外點鐘，安爾搖安爾搖，哇！風又更透，軍艦內底攏是米，載米，兵兒欲食之米，一包一包疊給滿滿，內底空氣陋，去頂頭風又更透，一個兵兒一直吐，我看有人食彼个汽水，彼个汽水罐兒，我給提來，我講你呸抵這兒，毋通吐抵土腳，大家企著這兒，你毋通吐，我就提一個甌兒，予伊吐，銅管就對，伊吐吐，我想給彼个吐之擲去海，即馬擲去風吹來，彼个管內攏是伊吐之，有兵講直接灌頂，失禮失禮！歹澀！無法度，擲落去風吹倒轉來，水潑著伊們之面，吐歸堆，哇安爾沒使，沒使。

我就給你牽著，我講你落去，風彼爾兒透，你安爾沒使，我就徙徙機器，弄乎平，創乎平了後，你倒你倒，你欲念觀世音菩薩，倒，我講我去頂頭，這內底空氣無好，伊講等一下，你什物名，我姓觀啦！世音、觀世音，是啦觀世音，對了！伊講安爾好，後回我著去綽觀世音，你逃一連？我也沒記伊之名；我講我姓觀，名就是世音，觀世音。

搖到金門去，死啊，到金門之土腳，還更抵搖，暈船，土腳一直搖，第二天講欲行軍啦，欲去太武山，安爾行軍，一天哇害了，去廚房提幾粒饅頭，貯著，高麗蔘貯著，我出門攏有齎高麗，腹肚枵一片含著，結果抵步隊一直一直行，喔！行到海印寺，我就走去內底拜佛，即馬一直行一直行，下晡場長伊講你食菜，抵我一連無好，我講我是第一名畢業。我毋信，我給你考試，喔！伊著講車是安怎發動，伊之油路電路安怎，我講這個我考試考過了，這是安怎會發動，還可以，我講本來就可以，我是第一名畢業之，我有彼个獎狀，劉安琪司令予我之，喔安爾喔，哇！對我就較客氣，我看你食菜，面安爾黃酸黃酸，你敢有法度行路，我講試看才知。喔即馬抵行山路，我就刁工行抵伊之頭前，精神百倍安爾行，阿彌陀佛行路更沒陋，我講三暝三日我無吃無飲無睡，我攏可以，臭彈！行路到一個所在，大家攏著坐，我就企之，高麗就含著，精神百倍，哇啊！再行三暝三日，我攏無關係，最後對我印象真好。

即馬抵軍中之時陣，在金門食飽閒仙仙，兵就安怎，毋予你閒，演講比賽、辯論比賽、拍槍比賽；演講是汝俺出家人之專長，欲辯論，所以軍中欲作壁報啦，或者是作什貨，無兵，就攏叫汝俺。抵彼兒時陣，結果吊單槓，平常時我攏偷偷練，伏地挺身啦，喔！擲手榴彈，我想講逐項沒使輸人，有閒我就去拾石頭，暗時無人我抵山頂，安爾擲石頭，有單槓我暗時練拉單槓、伏地挺身，我就走去水溝安爾練，水溝無水所在安爾練，所以欲文欲武我攏會使。結果彼个師長在辯論比賽中，人講彼个是和尚，伊口才沒陋，伊聽講是和尚，比賽了後我着冠軍，伊就來我們371營，聽講這個是出家師父，伊就著來，伊來，師長來，營長連長排長，攏愛來，你知無，來又更送這牛奶粉予我食，你知無，喔！連我之連長講，你之身分無共，師長送牛奶粉予你食，更親身來給你看，連長營長攏陪伊來，以後有什物空缺，攏沒使叫我做，我就開始讀佛經、金剛經，一直給背，逐工就是誦經過日子。

涼涼兒，創什貨你知無，管彼兒兵兒，車駛來我登記，叫阿兵哥汝修理這台，你去修理彼台，彼台什物問題我寫寫，你看伊即馬修理好了，我欲去駛，會使，簽名簽簽，通知對方彼个司機，伊之車修理好，緊駛走，駛走時簽一個名，閒仙仙。那休假我攏無出門，我抵茨內底誦經、拜佛，安爾，佛祖真正有保庇，實在有夠讚。抵金門作兵攏有十包薰，薪水以外更有十包薰，十包薰我想講，哎！攏逐工去提菜，啊抑欲烏紗一下，就提一包予彼个班長，廚房之班長，伊足愛食薰，十包一個月伊攏食無夠，我就一包予伊，存九包我就去賣，有福利社，所以我作兵毋免講寺廟寄錢予我，我更有存錢、長錢，加十包薰，所以軍中兩冬，一切攏真順利。

你做兵兩冬攏完全無訓練著？無訓練着，我拍槍真好，擲手榴彈抑是冠軍，擲手榴彈是安爾，五公尺十公尺二十公尺插旗兒，我擲了到底，旗攏我擲倒了，喔！國民黨予你打倒啦，我逐暗攏有練，逐暗攏做伏地挺身合擲石頭，所以伊們練習之時陣，我攏企著看，伊們講你攏沒抵練，我講毋免，到時我就會曉，其實我逐暗攏有練，我攏有準備，所以擲手榴彈，我攏擲上遠，國旗攏予我擲倒，伊們講國民黨予你打倒。在金門真正有足濟笑詼之事志，所以我抵彼个山洞，我創一個廚房，去買紅毛土，我家己築土腳，我創這個油路，汽油柴油攏有，我給淋淋之，就會當煮飯煮菜，飯我無煮，去連部彼兒提，啊菜是提轉來家己煮，啊菜是隨在汝俺提，彼濟人欲食，馬鈴薯、青菜、豆類，我攏提轉來，我家己煮煮來食。

但是你毋曾煮過菜，汝那會曉煮？啊出家人頭腦攏足好，彼時金門無洗身軀間兒，攏在外口洗身軀，一叢樹腳有挖一窟，雨來就有水，無雨來就沒水，彼時我去廚房提水來，提到我之廚房，攏是水車去外口載，我去提水抑更提菜，我家己一間細細之廚房，我家己一個人煮來食，彼个士官長看着我安爾，足欣賞；逐工攏曝日抵食飯，你看我抵茨內，一個人坐抵彼兒食，那煮那食，欲來參我作伙食，我講毋通毋通，所以抵這兒，足濟笑詼，有一工我予人騙去，喂！阿彌陀佛抵金門有動物園，挈帶你來看好無，有動物園我那會無聽過，喔！就給我挈帶去，講欲去看動物園，那行那笑，那行那笑，毋知抵笑什物，因為汝俺毋知伊們講動物園是什物意思，動物園就是軍中樂園，查某彼个事志，行到彼兒，這毋是動物園啊，我溜之逃走，喔夭壽，你們帶我來，結果是阿彌陀佛，那會安爾。

軍中足濟攏會給我創治，尾手兒我們就拜六、禮拜攏會照輪出去得桃，只要出去，這個碉堡一定愛有人來顧，我講逐禮拜毋免輪著我出去，逐禮拜攏我顧，你們出去，逐家攏對我足好，逐家出去了後，我就抵內底誦經拜佛，攏無要緊。所以我之佛學合英文抵彼兒學之，逐個月攏去買讀者文摘，逐個月我背一篇，我之英語是舞來，你知無？一篇文章彼是幾張你知無，彼些兒細細字兒，細細字兒，無師自通，我一直背文章，一直背、一直背，查字典，彼兒字典予我掀給烏烏，你知無，歸篇文章給背起來，一個月背一篇，這個月抑未到，頂個月背之，更提來重複，彼時陣就是安爾，抑更讀這一寡佛學之物件，「成佛之道」「學佛三要」啦！哇，印順導師之冊，我攏有讀安爾。

所以我做兵兩冬，攏無浪費時間，抵彼兒安爾，伊們彼些兵兒攏足愛我，因為我攏無照輪欲顧碉堡，彼當時伊們拍來槍彈，爆炸了後，抵我們頭前，我就把它拾起來，本來想講提轉來，無加贏。彼个爆炸起來，彼个不銹鋼足姝，我提來放在彼兒，放於鼎之，伊講攏有這個，我講前幾天爆抵彼兒，伊們之一爿拍來，爆在我們之頭前，抵我們之碉堡彼兒，兩冬真緊著過啊。當時好運，有人之兵期到了，欲延期才會當轉去，無船，啊！有人等等，啊等歸半個月，我好運，有一天營長講，阿彌陀佛你會當轉去，我講我抑沒到了，我兩冬抑沒到，伊講船期到了，這一期你那毋轉去你欲擱等外久你敢知，等半個月或是什貨，我講無喔，我欲這一班船，是啊！就是這一班船，你提早轉去了。趕緊就去買海苔，金門足濟海苔，等路會當家己食，啊買一寡馬鈴薯熾熾，存抵鼎內送予保養場之場長，我講我欲轉去，彼兒攏予你，足歡喜，提早轉來。

啊！坐二十幾點鐘到高雄，天已經暗了就去住旅社，我之習慣，毋愛參人作伙睏，四五個欲參我作伙倒轉去台北，我講你們一間我一間，我家己單獨一間，睏到半暝，老闆娘就來弄門，人客倌人客倌，下暗房間無夠，我這有一個人客合你作伙睏，好無，我想講房間錢真貴，我想欲家己一人睏，你那叫人來合我睏。拜託一下！我們下暗人客濟，這一人客無逃當睏，合你作伙睏，我出來看，是一個小姐啦，哎！阿彌陀佛。我給門關起來，我們之朋友講，人彼是師父啦，你那安爾，去叫查某合我睏，失禮失禮。

第二天我就落來，我講老闆娘，你知逃位有素食館？位這兒一直去，彼一條街有素食館。你想看～抵高雄欲轉去台北，愛四五點鐘，腹肚枵欲安怎，一定愛準備飯，汝俺是欲去買物件食，順續叫伊款一個，去買轉去台北。啊，結果食飽了後，就去坐車，轉到台北暗了，去綽我們之阿姐，我們之阿姐抵汐止，轉到彼兒七八點，我彼時作兵，剃二分頭。轉到彼兒差不多八九點，偎十點我講姐啊，予我修修，啊明兒早才修，我講毋愛了，住在寺廟更彼兒長，歹看，作兵兒攏麼是剃短短，緊給我剃。啊，明兒早才剃。我講毋愛，我就是下暗著愛剃剃。我攏穿出家衫，我毋穿在家衫。邊兒有一個小姐，一直給我看，我就一直叫。姐啊講，緊給我理理兒，我欲洗身軀，欲穿出家衫，哇彼个查某囝，感動第二天講，這個人強強欲出家安爾，第二天家己先走去出家，感動一會兒，我姐講你出家，叫伊出家毋，你轉來講緊給我剃，緊給我剃。伊安爾感動加，第二天就走去出家，即馬還在，伊若看著我，當彼時看我道心彼爾好，感動到出家，實在有影足濟笑詼。