以下是台南市賴醫師和普獻長老的對話，長老以臺語自述自己的身世，及出家弘法的過程，並接掌元光寺住持至今。內文共分五段：
一、家世環境 二、剃度出家 三、軍中生活 四、隨侍長老 五、住持元光。
***本文以臺語漢字呈現，請陳世明博士校對指導，以下是陳老師的創作。***
著作：臺語漢字學、圖解講臺語其實不難等。
網路平台：陳世明老師閩南語漢字學教學平台，youtube網路平台
閩南語字典：陳世明老師閩南語字典平台。
一、家世環境
我細漢四歲時陣，我之媽媽就往生啊。 印象中細漢攏是抵防空洞過日子，民國三十二年生之 ，三十三三十四三十五 ，才第二次世界大戰結束，所以我三年攏抵防空洞內底過日子，我細漢之印象是安爾。
尾手兒讀冊之時陣，小學到中學成績攏誠好。我們之吉安鄉彼兒足濟人，只有我一人考著花蓮中學，花蓮中學是上好之， 抵花蓮來講，花蓮若考無著，才去考工業學校；彼兒工業學校考無著；才會去考商業學校；商業學校若考無著；最後才去考農業學校，彼時全部攏會錄取，以前攏安爾，一直排落來。先考花中，二千外人去考，我著第十三名。
尾手兒我讀花中，花中邊兒有門諾會，基督教之門諾會，感覺不錯喔！去彼兒唱歌跳舞，感覺沒陋喔！男男女女手牽著手，唱歌跳舞，唱彼个聖歌什物之。我給我之茨內人講，毋愛叫我揭香，我無揭香拜祖先； 我沒使拜祖先，伊們講生你這個不孝子，你安爾悖骨，我毋知什物意思。
所以讀中學之時，每禮拜攏會去教會，抵彼兒讀聖經，愈讀就愈無想欲讀了。裡面講上帝萬能，創造萬物什物之，我們之一切運命攏是伊予汝俺之，我這個人真會疑心疑鬼之，想講真之有上帝，我問牧師：位世間山河大地這一切，孰創造之，伊們講上帝創造之，人抑是上帝創造，一切攏是伊創造之，我講彼个上帝真無良心，伊講抵逃無良心呢？伊安怎會創造離婚呢？我看足濟人離婚、相拍，讀冊抑看著真濟戰爭之消息，我上懷疑之是，上帝安怎會去創造癌症，予世間人生癌、生粒兒、咳嗽、破病，上帝安怎會創造這寡物件，我就開始懷疑。伊講彼是顯現伊之權威，顯示伊之萬能，我講這兒萬能，是害人之毋好，彼時彼个牧師講，你愛信才能得救啦！你信，後日才會挈帶你去天堂，天堂抵達，伊講到時你就知，你信就得救了。
我們讀中學時，加減頭殼攏會去想，想這安爾無通。尾手兒就少去，若有英語課，我就去聽英語，如果牧師講道，我就愈聽愈無興趣，我就毋去，結果無去了後。彼个牧師來我們茨拜訪 ，我看著伊們來，我趕緊匿起來，給我兄嫂講，伊們來之時陣，講我出去，一遍二遍三遍，伊們著沒來，彼時什物攏無信了。
有一個親戚之大姐就提一本冊，予我看，「成佛之道」印順導師寫之，我看頭前一句，就知下面彼句是什物，我以前毋曾看過，就知影頭前一句，下一句是什物，更再看就是安爾，我就想彼就是有緣，所以尾手兒，就開始讀「成佛之道」，真厚誠大本安爾。我讀到，裡面有些愛背之，我攏背起來，一直背，尾手兒就看到「成佛之道」有一個譬喻，我受彼个譬喻影響，足深足深。 伊講汝俺之人生，到底是安怎樣，伊有這個譬喻，親像一個人，茫茫渺渺，一直走一直走，想東想西，無向前看，就踣落古井。彼个古井無水，踣落兒去，往落看古井底有四條蛇，毒蛇，伊揭頭一直看，一欉樹足大欉，有一個樹藤從樹頂舒落來，舒到古井之內底，這個人看到樹藤呢，伊之手一把握著，想欲扒去頂頭，扒起來之時陣，忽然間看著藤之頂面，有彼个蜜蜂，彼之蜂蜜真甜，喔真甜，伊就用嘴舌去舔，真甜，食食，彼个蜜蜂著給伊叮，彼个蜂蜜是蜜蜂家己欲食，汝俺一直食，伊就叮你，太好食。
揭頭看看，彼兒藤之頂頭有二隻鳥鼠，白鳥鼠合烏鳥鼠，彼隻白鳥鼠，咬彼之藤一嘴，烏鳥鼠也咬一嘴，我一嘴、你一嘴，著安爾一直咬。彼个人想講，這個藤若被咬斷，我着會摔落去，摔落去着慘了，我就一直看彼个故事。想講佛經有這個故事，這影響我足大，它講這個人，看著鳥鼠咬彼之藤，但是這個蜜太好食，伊之嘴舌一直去舔，舔彼个蜜來食，那食那蜜蜂著叮伊，因為腹肚枵想欲食，毋管伊，予伊叮到兒沒記了，沒記彼个鳥鼠咬彼之藤，若咬斷，就踣落去，古井底有四隻毒蛇。
印順導師講這個故事，引起我之想法，伊講汝俺人呢，汝俺之身體，就是地水火風。碇硿硿就是地，唾嘴漦、放尿彼就是水，汝俺之血也是水較濟，地水，汝俺是36度，汝俺之溫度是36度，太冷就會死；太燒也會死，36度37度，這個無要緊，那38度著發燒了，39度著危險，40度彼之頭殼燒去。所以汝俺之地水火風，就是四隻蛇，有一天汝俺若沒喘氣，放火燒，就變火灰 對吧。地水火風無去，水也無，沒喘氣，所以汝俺之生命，就親像地水火風安爾，給汝俺維持之是蜜，蜜代表汝俺世間人上愛我，財色名食睡五欲。財色名食睡，汝俺逐工接觸就是這些而已。世間人為着這些，相拍、想辦法、欲偷、欲搶，也是欲食好、穿好，喔什物享受，財色名食睡 。但是有時陣，為了達到這個目的，犯法，伊也毋驚，予人關，伊也毋驚，伊出來也是照偷、照搶。彼个人伊去食彼个蜜之時陣，蜜蜂叮伊，予你叮，睬睬你，我有食著好，伊攏沒記了，沒記什物，沒記藤之頂頭，白鳥鼠烏鳥鼠抵著咬藤兒，咬斷就會摔落去。汝俺一口氣無來，就化成地水火風去了，燒燒就變成一堆火灰而已，喔！這個故事我看了了後，我想人生如果是安爾，欲如何才有意義？就一直抵想：人生之意義目的，是什物？白鳥鼠、烏鳥鼠，就是日時合暗時，白天和晚上。 汝俺一日一日安爾過，過一工就是減一工，所以人講過年過年，汝俺加一歲，其實是減一歲，彼時一直抵著思維講，人生之意義價值是什物？短短幾十年，就老病死，放火燒一燒，就變成一堆灰而已，一直想講這意義，我彼時帶抵日本茨，日本人走了後，我們之阿兄是農會總幹事，伊住抵彼个茨，日本人之茨，毋知用外濟錢呢，給政府買之就對啦，我們之阿兄合我們之阿嫂，足驁生，生一個查埔，生五個查某，細細漢細細漢，有之抑更抱著食乳，這也是真感謝，我們之阿兄合我們之阿嫂做一場戲，予我看。
伊們二人脾氣無好，定定無好，冤家安爾。冤家之時陣，就講欲離婚，五個查某囝兒，一個查埔囝兒，五個查某囝兒，企著無人欲愛；彼个查埔人叫阿常，時時常常，無常之常，阿常過來 伊也講阿常你過來，阿常企著中央，阿兄合阿嫂一人扭一隻手，你知毋？阿兄就講阿常你過來這爿，阿嫂就講你來這爿，你追我，伊企著中央， 哇！那安爾，結婚毋是真好嗎？小寡兒事志冤家，為了搶這個囝兒，查某之攏無人欲愛，這個予我感覺， 喔！敢通結婚。
抑有一幕予我看着， 抑有抱著囝兒，細細漢上細漢，因為我們睏大眠床、蓬床你知無？我合囝兒作伙睏，斂袂這個發燒，斂袂彼个漏屎，半暝我們之阿兄合阿嫂，喔！趕緊抱著去看醫生，附近攏有醫生注射，囝兒攏著放尿放屎，彼時塌塌米足大，暗時這個放尿，彼个放屎，洩尿洩屎，彼當時十二點外，抑更抱去予醫生注射，兩翁姥沒眠沒閒，冤家，冤家就搶查埔子，查某攏無人欲愛，逐日攏看彼戲演予我們看，就產生恐怖感，什物恐怖感你知無，沒使結婚，自然著講這個婚沒使結了去，生彼爾兒濟，喔！彼時我們之觀念講 ，結婚一直生，親像彘母安爾一直生，生彼爾大堆，伊們欲食欲穿。我之阿兄作總幹事，錢沒問題，但是安爾，這個姥是沒讀冊，我之阿兄合阿嫂差不多年紀，這個查某就是足姝，我之阿嫂彼時抵台北，台北好額人之囝，姓林安爾。
我曾經去台北有看著，出家了後我無去看伊，伊們之茨誠好額，賣彼个建材行，水泥、鐵釘，建材行誠大間，抵艋舺彼答，長沙街我曾經去看伊，我阿兄伊去台北開會，攏會住抵附近之旅社，就熟悉這個查某，我們之阿嫂，二個著去結婚，娶轉來，伊真可憐，沒曉講客話，我老爸足氣伊，會拍伊，合伊講話無聽話，就拍伊，給修理，逐家官會使拍新婦，我們之老爸足陋，我定定看伊給伊拍，伊無走喔，伊無走，安怎走，古早之人。我們之阿兄誠緣投，懸更緣投，又是總幹事，抵農會作老大，相當有地位之人，毋知二個個性攏壞，定定冤家，所以我會出家，就是講對這個婚姻有恐懼感。
留言列表
